Parch Hermione Morris

Swyddog Materion Gwledig

Mae Esgob Llanelwy wedi penodi’r Parch Hermione Morris yn Swyddog Materion Gwledig yr Esgobaeth.  Mae Hermione, sy’n offeiriad yn Ardal Genhadaeth Tanat –Efyrnwy, yn cymryd lle’r Parch Heather Fenton yn y swydd.

Yn 2019, treuliodd Hermione, sy’n briod â ffermwr bîff a defaid ac yn byw yn Llanfyllin, dri mis sabothol yn ymweld â chaplaniaethau a Swyddogion Gwledig Esgobaethol ar draws Cymru a Lloegr. Meddai: “Credaf fod fy apwyntiad i’r swydd hon yn ddilyniant i’r adeg o archwilio a darganfod.  Rwy’n ymwybodol iawn fod bod yn wledig yn fwy nag amaethyddiaeth a gwaith y tir a’i fod yn gwahaniaethu’n ôl y cyd-destun lleol.  Un o’r pethau rwy’n edrych ymlaen ato’n fawr iawn yw darganfod sut beth yw bywyd gwledig yn ac ar gyfer Ardaloedd Cenhadaeth eraill yn  yr esgobaeth, gan weithio a dathlu gyda phobl yno, wrth i ni barhau i weinidogaethu cariad Duw a’r newyddion da i bawb.

“Yn llawn llawenydd, gan ymhyfrydu yn y fraint a’r cyfrifoldeb, rwyf wedi derbyn penodiad gan Esgob Gregory fel Swyddog Materion Gwledig yr Esgobaeth, gan geisio dilyn ôl troed cadarn iawn y Parch Heather Fenton”.

Cafodd Hermione ei magu yng nghefn gwlad Caint , gan dreulio’i 24 mlynedd gyntaf yn gweithio mewn mannau trefol ac is-drefol, fel nyrs ac yna fel offeiriad.  Yn ystod y 10 mlynedd diwethaf mae hi wedi byw a gweinidogaethu yn Llanfyllin, yng nghefn gwlad Sir Drefaldwyn, sy’n rhan o Ardal Genhadaeth Tanat-Efyrnwy.  Cyfarfu a phriodi â’i gŵr yn ystod y cyfnod hwn gan ddod yr hyn y mae hi’n ei alw’n ‘ffermwr ysbeidiol’ yn ogystal â bod yn wraig fferm ac offeiriad mewn gofal o bedair eglwys mewn pum cymuned.

Ychwanegodd Hermione: “Trwy fy mhriodas a dod i ddeall ffermio a’r bywyd amaethyddol yn gynyddol well, a gyda’m gwreiddiau mewn cymunedau gwledig ac amaethyddol, mae Duw wedi tanio’r angerdd sydd ynof i ymestyn allan ac i weinidogaethu’r rhai sy’n byw ac yn gweithio’n bennaf yn y bywyd amaethyddol ac ar y tir.”

Cafodd Hermione ei phenodi  am dair blynedd i ddechrau ac yn ystod y 12 mis cyntaf mae’n gobeithio:

• datblygu ymhellach y tudalennau gwledig ar wefan yr esgobaeth er mwyn cyfeirio ymwelwyr i gefnogi ffermwyr a diwydiannau amaethyddol eraill
• dal i weddïo dros, a dechrau cyfarwyddo fy hunan yn ddyfnach, gydag Ardaloedd Cenhadaeth gwledig eraill yn yr esgobaeth (cyfyngiadau COVID-19 yn caniatáu)
• nodi pwy yw’r bobl ‘gyda diddordeb a sgiliau gwledig’ ar draws yr esgobaeth ac ystyried ffyrdd o ddod â nhw at ei gilydd
• sefydlu pa wyliau gwledig y gellid eu dathlu (ar wahân i’r Cynhaeaf) yn y cyd-destun, datblygu litwrgi ac adnoddau i annog a hyrwyddo eu dathlu
• cymryd rhan mewn cyfarfodydd a gwaith y grŵp Ymgynghorwyr / Swyddogion Bywyd Gwledig Taleithiol yr Eglwys yng Nghymru.

Yn ogystal â gweinidogaethu o fewn yr Eglwys yng Nghymru, mae Hermione hefyd yn rhan o dîm caplaniaid Cymdeithas Amaethyddol y Sioe Fawr yn Llanelwedd; yn wirfoddolwr gyda Rhwydwaith Cymuned Ffermio Cymru ac yn ymweld â mart y Trallwng fel rhan o’r swyddi hynny; ac mae’n aelod o Gymdeithas y Caplaniaid Amaethyddol.

Cysylltwch â Hermione: 01691 648306 neu gan email.